Kôm oét de kas op Jocus PekskesaovendDoor: Jocus P&P, 18-1-2010“Kôm oét de kas” is 't nieje motto van Jocus Pekskesaovend. Op 6 fibberwarie haole de bezeukers van 't vruugere Môtteballebal alles oét de kas um mekaar te euvertreffe mit ludieke invalle en kreasies. Al jaore langk is juus dezen bal daorum zoë bekind. 't Liek waal de groëten optoch.. maar dan binne. Deilnemers mit schitterende pakke, maar auk ’s-middaags in mekaar geflanste ideetjes zörge altied veur vuul bekieks.
De bezeukers die thoés in “d’n alde kleierkas" duike kinne dit jaor gebroék make van de twië zale en 't kefee van de Venlonazaal. In de groëte zaal speult de Jocus Hofkepèl en joekskepèl Neet um aan te huuere. In de kleine zaal is 'n klein podium wao idderein dae det wilt kin zinge of buute. Auk speule de joekskapèlle Dreej daag um en de Kösmuulkes in de kleine zaal.
Niej is det 't kefee weer aope is. Gehiël in alderwetse stiel (broën kefee) ingerich. Taeves steit d'r 'n bekinde formasie oét Kölle: de poppe van “Pappa Joe”. 'n Attractie oét Kölle dae speciaal veur de Pekskesaovend nao de Venlonazaal kump.
D'r is 'n team van schmickers det klaor steit um 'n idder nao wins te schmincken. En veur wae te weinig tied haet of thoés gen “alde kleierkas” haet de organisatie 'n ganse laajng kleier klaor hange in 'nnen alde kas. Mit 'n lekker pilske is 't dan auk nog ens lekker Indisch aete in 'n spesjale aetkraom.
Dezelfde middaag is d'r in de Klaosstraot 't traditionele “Prônke”. Dit jaor 'n waek vervruug in verband mit de Boétezitting. De deilnemers aan 't “Prônke” zien netuurlijk van herte welkom. As 't fees in de Klaosstraot aafgelaupe is, kinne ze metein door nao de Pekeskesaovend. Verkleije hoof tenslotte neet miër! En baovedeen meuge de winnaers van 't “Prônke” gratis nao binne.
De organisatse leet zoë wie idder jaor in de hand van de AZ-kemissie van Jocus. De kaartverkaup is op dinsdaag 26-1-2010 van 20.00 wies 21.00 oor en op zaoterdaag 30-1-2010 van 12.00 wies 13.00 oor, in kefee In d’n Dorstigen Haen aan de Mert. Kaarte koste €11,00 per stök.
 Deil dit artikel op Twitter
 Deil dit artikel op Facebook
|
