Vastelaovend 2.0

2011... Vastelaovend bisse zelf

Jocus nuuëdig ôch oét um mei te doon mit waat weej neume: "Vastelaovend 2.0" - 'n dialoog binne de Venlose gemeinschap euver de toekôms van de vastelaovend. Um 't iets konkreter te make wille same mit ôch gaon naodinke euver 'n niej (vastelaoves-) evenement. Geej kint ôs dao beej helpe!

Introduksie
Weej wille de kômmende maonde euver ziër oéteinlaupende zake mit ôch van gedachte gaon wissele. Dit doon we in 'n aope, transparante dialoog. 't Platform wao-op dees dialoog plaatsvindt is 't thoéblaad van Jocus. Idderein meug meidoon; idderein meug ideeje aandrage; en idderein meug op elkaars ideeje reagere. Jocus zal probere um steeds de roëje draod binne de dialoog te beneume en dao-op vaerder gaon.

De dialoog zal haufzakelik plaatsvinde via online forum-discussies en polls. Vaerder zulle we zoevuul meugelik gebroék gaon make van de sociale media wie Twitter, Facebook, Hyves en LinkedIn um einerzijds deilnemers te bereike binnen de gemeinschap en anderzijds um ein zoë groët meugelik klankbord te laote ontstaon veur dit projek.

Stappeplan
Weej wille de dialoog in 't kader van "Vastelaovend 2.0" verdeile in 'n aantal stappe:

• Oriëntasie
  (waat zoel 't algemeine thema kinne zien, waat veur soort evenement, welke datum / kump 'n ander evenement te vervalle, 'n "nieje tradisie"?)

• Verkinning
  (waat is d'r winselijk veur de invölling van 't evenement; dinke zonder grenze, wao wuurt 't georganiseerd, wae wille d'r meiwerke, taaklieste)

• Seleksie
  (keeze oét alle ideeje, destillere van haufdliene, globale tiedtaofel veur 't evenement)

• Oétveuring
  (daadwerkelijke taakverdeiling, planning, veurbereiding en organisasie van 't evenement)

• Evaluasie
  (truukkoppeling nao alle deilnemers in de dialoog, truukblik op 't evenement, doorzette van 't ideej, beejschave of opniej beginne?)

Ein veurwaarde: anonieme deilname is oétgeslaote; weej vraoge ôch daorum aan te melde veur deilname.

Laote we beginne beej 't begin: meldt ôch noow aan veur deilname aan Vastelaovend 2.0!