Vraoge aan Jocus

Heb geej 'n vraog aan Jocus? Steur dae dan aan ôs door.
Iërder gestelde vraoge zien heej truuk te laeze:

Vraog: Ik wil meidoon mit de groëte optoch. Waat môt ik daoveur doon?

Antwoord: Bezeuk ein van de praotaovende, georganiseerd door de Technische Kemissie. Heej kriég geej informasie euver ôch deilname, kint geej ôch aanmelde en kint geej euverige vraoge stelle. Bekiék heej auk de reglemente veur deilname aan de optoch.

Vraog: Ik wil ein vastelaovesleedje beej Jocus inlevere. Wie geit det in zien werk?

Antwoord: Op dit thoésblaad staon de reglemente veur leedjes van de Jocus.

Vraog: Wae beslis wae d'r Prins Carnaval wuurt?

Antwoord: De keus van Prins Carnaval is in hand van Vors Joeccius XI. Meistal rond begin december wuurt ein ras-echte Venlose jông verras mit "De Vraog". De Prins Carnaval meug zélf zien adjudante oétzeuke.

Vraog: Waorum haet Jocus ein haan as logo?

Antwoord: De verschillende verklaoringe heejveur waere door drs. Theo Fransen oéteingezatte in 't book "14 x 11 jaor Jocus". Ein samenvatting kint geej heej laeze.

Vraog: Veur sommige evenemente zien de kaarte binne 'n ziër korte tiéd oétverkoch. Wie kump det? Kan 'n evenement auk twië kier waere georganiseerd?

Antwoord: Jocus haet min of miër ein (pienlijk) probleem.
Hiël vuul minse wille dolgaer ôs evenemente bezeuke, maar kinne neet altiéd de kaarte daorveur bemachtige.
Det haet van de eine kant te make met 't feit dat d'r per evenement op las van de brandweer maar ein X-aantal minse de zaal in meuge en weej dus gebônde zien aan ein maximaal aantal toelaotinge. Van de andere kant det me taegeswoordig daordoor inderdaad al vruug veur in de riej môt gaon staon um beej de ierste "tig" te zien ter bemachtiging van kaarte. Ut ein bringk ut ander met zich mei en waor veuralsnog weinig of niks aan te doon is. Kiék maar ens beej de vreeje verkaup Maaspoort abonnemente. Auk dao löp ut zoë good desse vruug in de riej môs gaon staon um ein nummerke te bemachtige um aansloêtend kaarte te meuge kaupe.

Waat betreft ut herhaole van ôs evenemente.
Begriépelijk is desse eine Leedjesaovend maar eine kiër kins bringe. Daoveur, um alle minse toch te kinne laote meigenete van det prachtig Venloos wedstrijdelement, zien weej live op d'n tillevisie gegaon. En Jocus haet gezeen dat maar leefs 60.000 doézend minse de oétzending bekeke en hoëg gehonoreerd hebbe.
De Prônkzitting wuurt al veuraafgegaon door de Venlosen aovend um zoëvuul meugelik minse mei te laote genete. De Boeremoosbal wuurt gevolg door ut Naopraote. De Hofbal door 't Matinee Musical en zoë vaerder.
Jocus duit zoëvuul meugelijk eur bes um vuul Venlonaere mei te laote geneete, maar auk heejbeej zien weej waal ens aan hand en veut gebônde.

Jocus Joekskemmissie

Vraog: In Venlo hebbe weej ut altiéd euver Vastelaovend. Waorum het de Prins dan Prins Carnaval?
Ingesteurd door: Schatorjé/v.d.Wijngaard

Antwoord: Volges de sirremoniemeister van Jocus kump dit door 't volgende:
ut fees waat weej viere, is ein verbastering van 2 feeste. Namelik 't linte fees en de vastenaovend. ut linte fees wuurt auk waal carnavalia geneump, heej beej huurt eine prins. Dus prins carnaval.
De zuus waal weer: mit Vastelaovend is alles anders. En daobeej: perbeer ens te zinge "Prins Vastelaovend", det löp toch neet!

Vraog: Waat is Jocus EXTRAnet en waat duit 't?

Antwoord: 't Jocus Extranet is 'n functionaliteit veur intern gebroek beej Jocus.
Via 't internet is dit euveral ter waereld bereikbaar. De belangriekste funktie is straumliening en verbaetering van interne kommunikasie. Vaerder staon heej-op: 'n interne aktiviteite-kalender/agenda en notule van vergaderinge, andere documente en discussieforums.