Oétgeleech

Insteure leedjes

Schriévers/Teksdichters en kômponiste opgelet! De inschrieving veur de nieje leedjes is geaöpend. Steur ôg leedjes in veur zaoterdaag 25 juli um 23:59 oor. Laes wiejer veur 't reglement en miër informatie.

 

Niejs

Inschriéving Jocus Veurselectie

Woensdaag 15 april 2020

Terwiél de veugel fluite en de veurjaorszôn schient, is auk 't Stedje van Lol en Plezeer bedek door ein dômpige Coronawolk. Stiekum kiék idderein oét nao joeksigere tieje. Wae wet zörge dees moeilikke daag auk veur inspiratie...

Vanaaf zaoterdaag 18 april kint geej ôg nieje vastelaovesleedjes insteure veur de Veurseleksie. Miër informatie en de inschriéving vindt geej heej.
Steur ôg inzending uuterlik in op zaoterdaag 25 juli um 23:59 oor, want daonao zal de inschriéving geslaote waere.

Jocus Veurselectie zal plaatsvinde op zaoterdaag 29 augustus, tenzij de actuele situatie mak det weej tot ein andere moment môtte gaon kômme.
Auk Jocus neemp netuurlik de veurgeschreve veurzörgsmaatregele in ach. Hald ôs thoésblaad en social media kenale in de gater veur t letste niejs en eventuele wiéziginge.

Weej zien beniejd nao ôg nieje inzendinge en gaon intösse op de achtergrond wiejer mit ’t in de steigers zette van ’t nieje vastelaovessezoen. Weej haope ôs flot weer op dae joeksigen tiéd te meuge gaon verheuge!

 

In memoriam: Evert Theunissen

Vriedaag 10 april 2020

Mit verslageheid en bedreuf vernome weej ’t haergaon van
d’n hiër Evert Theunissen
 
Commandeur in de Orde van de Zwalm
Ald-Barôn van Inkhoézen tot Pennenberg
Ald-Börggraaf Pottekieker

Mit zien scherpe doch positieve pen vervölde hae vol verve ’t ambt van sikkertaris en van veurzitter van Jocus P&P kemissie.
Deze aimabele, erudiete mins, dae gezaegend waas mit fiene humor, zoot vuuële jaore zien talente in veur Jocus en de Venlose Vastelaovend.
Weej zien um heej ziër erkintelik veur en gedinke Evert mit groët respek.
Weej winse zien leefste Myrriam, kinder en kleinkinder vuuël sterkte mit dit groëte verleer.

Names alle leeje van Venloosch Vastelaoves Gezelschap Jocus
Roel Versleijen, veurzitter/vors