Oétgeleech

Tentoënstelling Piet Camps in Jocus Museum

Vanaaf zondaag 13 juni is 't Jocus Museum weer geäöpend. In de nieje tentoënstelling 'Waas geteikend' wuurt ein hommage gebrach aan Jocus' Hofteikenaer Piet Camps.

Iddere zondaag is 't Jocus Museum geäöpend van 13.00 wies 17.00 oor. Boéte dees tieje is 't auk meugelik um 't museum op aafspraok te bezeuke.

Kiék veur miër info op jocusvenlo.nl/museum

Niejs

Jocus Museum iërt Piet Camps mit tentoënstelling 'Waas geteikend'

Zondaag 13 juni 2021

Vanaaf zondaag 13 juni is 't Jocus Museum weer geäöpend. In de nieje tentoënstelling 'Waas geteikend' wuurt ein hommage gebrach aan Jocus' Hofteikenaer Piet Camps. De äöpeningshandeling woort verrich door de femilie Camps.

De veurzitter van 't Jocus Museum, d'n hiér Renier Linders is gruuëts det de tentoënstelling veur idderein is te bezichtige. "Piet Camps is vanaaf de jaore fiéftig beeldbepaolend is gewaes veur Jocus en Venlo. Hae kombineerde ein ôngekinde kreativiteit mit humor en schônk Venlo ein ôntelbaar aantal teikeninge, stök veur stök groëte en kleinere kunswerkskes. Weej zien gruuëts um 'ôzze' Piet mit dees tentoënstelling in 't vootleech te meuge zette."

Euver Piet Camps:
Piet Camps woort haos mit ein potloëd in de hand gebaore, al op zevetiën jäörige laeftiéd begôs hae mit teikene. Beej Jocus waas hae lid van Jocus' Pers & Propaganda kemissie en teikende hae vanaaf 1949 wies 2011. Meis bekind zien zien kreaties veur Staatsorgaan De Träöt. Piet Camps is De Träöt, en andersum, nog altiéd. Auk teikende hae LP-hoéze, de waalbekinde 'köpkes' beej de Jocusleedjes, maar auk de hoésordes van minnig Jocus Dreejspan. Auk d'n huidige Jocushaan is van Piet zien hand.

Veur vuuël bedriéve verzörgde hae ein advertentie, waovan d'r nog altiéd ein aantal in De Träöt geplaats waere. Daonaeve waas Piet Camps jaorelang as cartoonis verbônde aan Tante Bet en later 't E3-journaal.

Renier Linders euver de tentoënstelling 'Waas geteikend': "Same mit de femilie hebbe we geperbeerd ein waerdige selectie van al zien werk te make. Det waas ein waore opgave um iër te doon aan al die kunswerkskes die hae haet veurtgebrach. Daomei haet hae zoëvuuël minse ein plezeer gedaon. Det is hiël moei. Weej zien gruuëts um in ôs museum einen haup origineel werk te meuge tuine. Want vergaet neet: álles waat Piet teikende waas handwerk. In de tentoënstelling laote weej auk zien teikenprocess zeen: iërs schetse, de teikeninge mit de hand op maot bringe en vervolges euvertrekke nao ein zwart-wit origineel. Daonao kleurde hae de teikeninge - auk mit de hand - in en woort zien teikeninge van téksverzeen. Nao al zien werk zoelse oore kinne kiéke."

äöpeningstieje Jocus Museum:
Tiedes de 'lockdown' haet ‘t Jocus Museum ein waore metamorfose ondergaon. Mit nieje vitrines en einen haup nieje kôllektiestökke is d'r nog miër te zeen.

‘t Museum is veur idderein toegankelijk. Iddere zondaag is 't Jocus Museum geäöpend van 13.00 wies 17.00 oor. D'n intreepriés bedruuëg € 5 per persoën. Heejveur ôntvangk geej 't unieke Jocus 1842 speldje. Boéte dees tieje is 't auk meugelik um 't museum op aafspraok te bezeuke.

In samewerking mit Bookhandel Koops en de femilie Camps kriég idder gezelschap nao bezeuk ‘t book “Piet Camps in Beeld” gratis mei (zoë lang de veurraod strek).
Ein bezeuk op aafspraok kin gemak waere via Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.

K
iék auk op: www.jocus.nl/museum 

 

Oétkomste Jocus enquête bekind

Woensdaag 05 mei 2021

Van 9 wies 29 miërt deej Onderzoeksbureau Markteffect oét Eindhoven ônderzeuk nao de  vastelaovesbelaeving in de regio Venlo en de beejdrage van Venloosch Vastelaoves Gezelschap Jocus dao-aan. In korten tiéd nome ongeviër 2000 inwoëners aktief deil aan de online enquête. Ein biezônder hoëge deilname  volges ‘t onderzeuksbureau. D'n hoëge respons beteikent det de oétkômste ein  betrouwbaarheid van 95% hebbe. Intösse zien  auk de inhaldelikke rissultate bekind. Inkele  daovan springe in ‘t aug: De Groëte Venlosen  Optoch en de Boerebroélof zien de meis  bezôchte Jocusactiviteite. Vastelaovesdinsdaag  wuurt door de Venlonaere ‘t hoëgst gewaardeerd van alle vastelaovesdaag. 
 
73% van de Venlonaere keek nao de volledige oétzending  van Opus Jocus Leedjesaovend,  waobeej  51%  de oétzending live volgde. De beejdrage  van  Jocus aan de instandhalding van de vastelaovend wuurt door de Venlonaere op ein  schaal van 0 tot 10 gewaard mit ein 8.4.
 
Noord-Limburgers  beoordeile de  beejdrage van  Jocus mit ein 7.6. Opvallend is det  jôngere  (ônder  de  laeftiéd van 30  jaor) miër waerd hechte aan  tradities en protocolle in vergeliék mit aldere die  dökker op zeuk zien nao verniejing en innovatie. 
 
De oétgebreide onderzeuksresultate waere in  juni door de Raod van Elf van Jocus gebroék as beejdrage veur eur jäörlikse evaluatie.