Zölle weej dan nôw maar nao de broelof gaon?

‘t werk det is gebeurd

Boerebroélof

Dinsdaag 4 Maart 2025
vanaaf 13:30 oor
Binnestad

Veur vuuël vastelaovesvierders is de boére dinsdaag de moeisten daag van de Vastelaovend. Venlonaere die de stad oeits hebbe verlaote um zich örges anders te vestige kômme speciaal veur dit fantastische fees truuk nao ’t Stedje van Lol en Plezeer.

D’n daag begint mit de kôffietuiterie (eine gojjen baom is belangriék), waonao veuraafgaond aan de Boerebroélof-sirremonie op ‘t Venlose stadhoés  ‘t gans gezelschap en idderein dae mei wilt in eine bônten broélofsoptoch door de Venlose binnestad trek.

Opstelle veur d’n boere optoch vanaaf 13:00 op de Alde Mert, aanvang 13:30. Route: Jeustraot, Kwartelemert, Hoëgstraot, Vleisstraot, Klaosstraot, Parade, Gashoésstraot, Mert. Op d’n tomp Hoëgstraot/Vleisstraot neemp ‘t Boerebroélofsgezelschap ‘t defilé aaf.

Idderein dae det wilt meug mei in d’n optoch! De ganse Mert is gevöld mit boere en boerinne as getuuge as ‘t broédspaar op ‘t bordes van ‘t stadhoés in de ônech verbônde wuurt.

Dit jaor is de organisasie van de boérebroelof in hand van de Molukse Gemeinschap in Venlo.

Bekiék de gezelschappe door de jaore haer

Zölle weej dan nôw maar nao de Broélof gaon?

’t Werk det is gebeurd,
Nôw zien we oëtgekneurd.
Waat hebbe weej gepaes.
De verkes zien gevoord.
De tuite zien geschoord.
Weej zien in de kuup gewaes.

Refrein:
Zulle weej dan nôw maar nao de broelof gaon
Det guf ein gooje wei.
Hebbe weej neet lang genôg al druëg gestaon
Wae geit d’r met ôs mei.
Wae neet vaerdig is dae kump ôs dan maar nao.
De boeredöchter zien al dao
En dan zulle we ens kiëke of ’t stump
Det van ein broelof ein broelof kump.

De zoog die haet gebag.
De mök dae is geslach.
De biëste zien verzörg.
De geerton is gelaeg.
’t Hoës dat is gevaeg.
De mis is weggeschörg.

Gemôlke is de geit.
De flatse zien gespreid.
Gepoets is ouk ’t paerd.
Gedaon is det gemelk.
De stal dae is gekelk
En de schop dae is gekaerd.