Is 11 x 4,54 jaor geleje gebaore vlak beej d’n toenmalige Jocus Hoonderstal en is opgegreujd in Venlo-oës en haet ’t atheneum op de alde Rijks gevolg. D’n Hoëgheid haet vastelaovend liëre viere vanaaf de Maagdenberg, via de Prins, de Staak, Willemina, National, TufTuf, de Blauwe…. nao Pollux, de Witte, Take Five en ’t Stadhoés. Hae waas volleyballer en trainer en al jônk veurzitter van Valuas/VCT (noow Civitas) en studeerde korten tiéd politicologie in Numwaege en woord daonao opgeleid tot sportlieraar. Peter haet gewerk beej de gemeinte Amsterdam (Sportzake) en NOC*NSF (directeur Breidtesport). Hae is pap van Nina en Julia, partner van Mieke en behalve mit dees dreej auk samewoënend mit Remco en Yuri, midde in de stad. De Prins waas sinds 1990 lid van de gemeinteraod en is vanaaf 1998 wethalder in Venlo. Hae haet de vastelaovend in portefeuille….Haet zich (sterk) ontwikkeld van Vastelaovesbiës (viéf daag op de lappe en dreej daag krank) wies Vastelaovesfienpreuver (geneete van de krinte oét de pap en aope hoees op de Van Cleefstraot) en is gruuëts op Venlo, op de Venlose minse, de Vastelaovend én op ’t Dreespan en is ziër veriërd Hoëgheid te meuge zien van ’t moeiste en aldste Vastelaovesgezelschap van Nederland!