Prins Lex I (Uiting) is 30 jaor en woënt same mit Susan Oostdam.
As kleinen hens beklôm d’n Hoëgheid al minnige buun. Op jonge laeftiéd traoj hae op as ein imitatie van Hay Crompvoets en Wiel Vestjens, kompleet mit stroëie hudje mit eur leedje “Had ik maar”. Meziék make is al zien ganse laeve zien grutse hobby.
As vieftiën jäörige makde hae zien tillevisie debut beej Umroop Venlo mit Kloek TV. In 2003 woort d’n Hoëgheid door zien broor Dick gevraog um as gaszenger van zien bendje op te traeje in kefee de Locomotief tiédes de Nach van ‘t Limburgse Leed: (zoëmaar) waas gebaore.
In ’t dageliks laeve is d’n Hoëgheid werkzaam beej BNN. In de aafgeloupe jaore haet hae aan diverse radio- en tillevisieprogramma’s meigewerk. Onder andere as redacteur van Giel! op 3FM. Op dit moment haet zien eige radioprogram op de zaoterdaagnach beej 3FM. In ‘t aafgeloupe naojaor waas hae op d’n tillevisie onder andere te zeen as prissentator van Kinderen veur Kinderen, verslaaggaever beej ’t Sinterklaasjournaal en deilnemer van Expeditie Robinson.
Door zien werk veur radio en tillevisie meus hae noëdgedwônge oét Venlo verhoéze. Daoeuver zaet d’n Hoëgheid: “Mien werk makde det ik neet miër dageliks tösse Venlo en de Randstad op en neer kôs reize. Mit pien in mien hert meus ik Venlo verlaote. Mien liéf vertrok oét Venlo, aevel mien hert bleef achter. Idder moment det ‘t dan ouk toeluuët gaon ik Truuk, Truuk, Truuk nao Venlo!”
As prissentator stond hae op vuuël Venlose podia zoëas ‘t Zomerparkfees en Opus Jocus leedjesaovend. Op dees jôngste editie vroog Vors Joeccius XI um danauk um de rol van Prins Carnaval 2017 te gaon vervölle. Zien spôntane reaksie waas: “Dich wets neet waosse aan begins”. Vors Joeccius XI antwoorde: “Maak dich maar gen dieke bein. Ik heb d’r hiél good euver naogedach.”