Adjudant 2 Martijn Peters (37) woënt same met Anke Rutten. In zien kinderjaore waas thoés de Vastelaovend en meziék alles waat de klok sloog. Zien vader Martin waas zenger en leedjesschriéver en speulde beej de legendarische joekskepel Kappes Kook, ôntstaon tiédes de broélof van zien elders. Wie hae zes maond ald woort hae al meigenaome op ‘t bekinde Joeksmobiel. Jaore lang vierde hae as kind de vastelaovend zoë mei en woort taege d’n aovend taege ziene zin in op de taxi gezatte wao opa en oma um dan thoés opwachde.
Op ’t Thomascollege is ziene vaste vrindegroep ontstaon. Mit eur vierde en viert hae nog altiéd de vastelaovend en ’t Zomerparkfees, wao hae ouk as vreejwilliger betrokke is.
In Eindhoven woort Sociale Economie gestudeerd, gevolg door ein universitaire opleiding in Nijmegen. Idder moment det de studie ‘t toeleet zoot hae weer in Venlo beej zien vrindegroep of um waat beej te verdeene. Zoë woort onder andere gewerk achter de bar van Ank en Bart den Biesen op de tennisclub. De piano van Bart steit now nog altiéd beej um in de hoéskamer.
Nao zien opleidinge trok hae de groëte boétewaereld in via ein rondreis door Zuud Amerika. Heejvan zaet hae: “Dit waas ein ziër biezôndere ervaring. Maar nao ein half jaor waas mien geld op en meus ik truuk. Wie fantastisch dae tiéd ouk waas, erg dök verlangde ik stiekem truuk nao ‘t Stedje van Lol en Plezeer.”
Ouk sport löp as roëien draod door zien laeve. Hae haet de Venloop al 4 kiër oétgelaupe. Ouk de Alpe d’HuZes - ’t jäörlikse fiets- en loupevenement van KWF Kankerbestrijding - steit twië kiër in zien daagbook opgeteikend.
Oétintellik kôs hae beej d’n Tennisbond aan de slaag. Ouk haet Martijn veur ‘t KWF as campagnecoördinator gewerk. Op dit moment is hae werkzaam veur de Nederlandse Reddingsbrigade. Dao haet hae in april 2015 ‘t waereldkampioenschap Live Saving georganiseerd.
Ziene werkkring haet ouk veroorzaak det hae zien thoés boéte Venlo neer meus zette. Jaorelang haet hae mit d’n Hoëgheid midde in de Jordaan samegewoënd. Ouk veur um geldt det as zien werkkring in Venlo had gelaege, hae de stad noëits zoel hebbe verlaote.