Prins Erik I (Schnock) is 45 jaor en getrouwd mit Lyanne. Zeej hebbe same dreej döchter van viéftiën, elf en tiën jaor ald. In ‘t dageliks laeve is hae eigenaer van Healthcare.

Hoëgheid Erik: “Ik werk gaer mit en tösse de minse en bin auk eine probleemoplosser. ‘t Duit mich deug en guuëf mich vuuël voldooning as ik ein steinke beej kin drage um minse tot ontploëing te zeen kômme. Ik bin einen echte doorbiéter en maak de dinger wao ik aan begin auk ech aaf.”

Naeve zien drökke werkzaamhede en zien gezin vindt d’n Hoëgheid zien ôntspanning in ‘t hardlaupe. “In 2003 heb ik ein aantal minse gevraog of zeej same de marathon van New York woele laupe. Op d’n Hofbal van det jaor vroog ik det auk aan mienen Adjudant en groëte vrind Paul Hekkens. Dit had tot gevolg det mit weej eine groep van viéf-enzestig laupers en viertig supporters mei hebbe gedaon aan de Big Apple Marathon. Same mit ein aantal van die laupers woort ‘t ideej gevat um auk in Venlo eine laupwedstriéd te organisere: zoë woort de Venloop gebaore.” Nao vanaaf ’t begin bestuurslid te zien gewaes, is d’n Hoëgheid al eine gas jaor veurzitter van dit prachtige evenement.

Erik Schnock is genne ônbekinde veur Jocus. Twelf jaor haet hae deil oétgemak van de Raod van Elf, as veurzitter van de AZ kemmissie en later as Vice Veurzitter van Jocus.  Vraogend nao zien meis memorabele moment, zaet hae: “Beslis det weej d’r in zien geslaag um Jocus Toekôms binne Jocus te integrere en det ik die ker heb meuge trekke guuëf mich nog steeds ein werm en good geveul. Taeves heb ik mien beejdrage meuge levere aan de oprichting van de Sociëteit Jocus 1842.”

D’n Hoëgheid woort gevraog tiédes ein al langer gepland aetentje, daags nao Jocus Leedjesaovend. Nao bekômme te zien van de schrik volgde metein ein volmundig: “Jao en ik weit auk al wae mien Adjudante gaon waere.”

Uiteraard zagte zien vrinde Paul en Dominique auk metein “Jao!” en zoë kos begôs waere aan alle veurbereidinge: “Ik heb genaote van alles waat gedaon en geregeld meus waere. In dees periode heb ik auk geliërd um te leege en smoesjes te verzinne, iets waat eigelik taegeneteurlik is veur mich. Zeker as mien aldste dochter Amber mich ‘t veur weer ens aan de scheene loog. Ik kôs zegke waat ik woel, het zag steeds: “Pap, dich wuurs kômmende vastelaovend Prins.” Ik heb daovan intens genaote maar spits mich nog miër op alles waat de kômmende waeke op mich en mien Adjudante aaf geit kômme. Vanaaf d’n Hofbal wies Aswoensdaag wille weej de Joeks en ‘t plezeer oétdrage euver gans Venlo op ein wiés die dees stad verdeend en die jubilerend Jocuswaerdig is.”