Niej Jocusevenement op de Parade

De Parade steit op zaoterdaag 18 fibberwari in ‘t teiken van Jocus Joetsaovend. Dit nieje Jocusevenement begint geliék nao ’t Prônke’ op de Klaosstraot. Alhoewaal ‘t as ein niej evenement wuurt gelanceerd, zal ‘t veur vuuël Venlonaere hiël vertrouwd in de oére klinke. Lekker ‘joetse’, oftewaal van kefee nao kefee trekke, gooie bekinde treffe en schaele wazel verkoupe, mit joekskepelle die op de Parade meziék make.

Idderein kan veur € 11,- ein stempelkaart koupe. Daoveur kriegse in idder van de zeve kefees ein gratis consumptie. Hesse alle zeve stempels verzameld, dan kriegse ein echte ‘Jocus Joetsaovend 2017´ medallie, ôntworpe door Hofteikenaer Leon Peeters, op de bors gespeld. Dit is ein biezôndere en exclusieve medalie die idder jaor ein niej ôntwerp zal hebbe en ein beperkte oplage haet, ein waor collectorsitem dus veur de Venlose vastelaovesvierder.

Kaarte veur deze Jocus Joetsaovend zien vanaaf 28 jannewari te koup via www.jocus.nl en beej de deilnemende kefees: Kefee Pollux, De Tapperie, De Galerie, De Brasserie, Leo’s Proeflokaal, Kefee Bonjoere en De Keulse Ker.

D’n aovend deurt van 17.11 wies 23.11 oor. Kôm verkleid want de vastelaovend bisse en makse zelf.