In ein tillevisieprogramma van JocusTV is de nieje editie van Staatsorgaan De Träöt geprissenteerd. Roy Dambacher, Börggraaf Pottekiéker en veurzitter van Jocus’ P&P kemissie: “Mit dees speciale editie wille weej de vastelaovend beej de minse thoésbringe. Juus in dezen tiéd vinde weej ’t belangriék um mit De Träöt ’t vastelaovesgeveul op te roope. En neet te vergaete de geteikende baodschappe van ôs adverteerders. Dit jaor miër as veurige jaore. ’t Is hiel speciaal um te zeen wie ôs adverteerders en sponsore Jocus en ôs vastelaovend zoë tot groëte steun zien.”
In de 74e editie van De Träöt vuuël prachtige en nog neet iërder gepubliceerde foto’s en biezondere verhaole. En, auk in dit jaor steit d’r in De Träöt eine nieje Prins! Det alles wuurt beejeingebrach in eine unieke Träötumslaag wao-in De Träöt door de jaore haer op prachtige wiés wuurt gevange. Ein waor kôllektersitem.
De biezôndere vastelaovend van 2021 wuurt op prachtige wies in beeld gebrach door Constance Jentjens. Auk steurde vuuël laezers eur foto’s in um te laote zeen wie zeej ’t veurig jaor de vastelaovend hebbe gevierd.
Vaste gasschriévers Bert Pollux, Gé Smeets en Funs Peeters bringe mit eur joeksige verhaole weer vuuël schaele wazel. Hans Jacobs haet mit Ridder Kunibald weer ein spannend verhaol belaef, terwiel Träötcolumniste Lucas Bremmers en Peter Leijsten zoë euren eige kiék op de aankômmende vastelaovend gaeve.
Eine nieje rubriek in De Träöt is Vastelaovend zien weej! Same mit onder andere Vors Joeccius XI Roel Versleijen en ald Prins Jeroen van den Ham duik De Träöt in eur vastelaovesalbums. Mit prachtige en persuuënlikke foto’s vertelle zeej waat veur eur de vastelaovend zoë speciaal mak.
Auk waere in deze rubriek de werkende leeje van Jocus diekverdeend in ’t zunke gezatte. De nieje rubriek is auk te volge via Jocus zien social media kanale via #vastelaovendzienweej. Frank Verhaagh schreef ein verhaol euver ‘t Kommissariaat Riej & Traksie, zeej zörg veur alle transport binne Jocus en de verkaup van Jocus artikele, en bestaon dit jaor 4x11 jaor.
Maarten Bastiaens schreef ein moeie beejdrage euver Jocus Toekôms as bakermat veur de jeugvastelaovend. Hae sprook mit Max Peuten, Quinn Vaessen en Bert Pollux die verhaole ophaolde euver euren tiéd beej Jocus Toekôms en wie zeej zien ‘doorgestruimp’ nao ‘groëte broor’ Jocus.
Mat van Rhee sprook met Loek Delsing – al jaor en daag Jocus’ Hofleverancier van Prinsescèpters en vuuël miër. Mit prachtige anekdotes vertelt Loek oétgebreid euver zien vakwerk van de hôltsniejkuns door de jaore haer. Minnig Jocus Dreejspan en Boerebroélofsgezelschap môch straole mit ein van zien ‘kunswerke’.
’t Jocus Archief schreef ein prachtig verhaol euver de vastelaovend van 1898: ein biezonder jaor in de Jocushistorie. ’t Verhaol is ein waore stadswandeling door ’t Venlo van de 19e iëuw. Tiédes ’t schriéve van ’t verhaol woort auk d’n Hoëgheid van det jaor ôntdek: Paul Thywissen ging det jaor de vastelaovend veur as Prins Paul I.
En! De Träöt wuurt aafgeslaote mit einen buut van ‘de Bôks’. Zoë kint geej thoés zelf in d’n buut kroépe en de vastelaovend in hoés haole.
De Träöt is vanaaf donderdaag 10 fibberwari verkriégbaar via de bekinde verkauppunt. Kiék op: https://www.jocusvenlo.nl/vastelaovend/de-traot
De speciale oétzending van JocusTV mit de Träötprissentatie is te zeen op www.jocus.nl/jocus-tv.
Download aafbeelding prissentatie 1
Download aafbeelding prissentatie 2
Download cover träöt 2022
