Äöpeningstieje Jocus Museum:
't Aafgelaupe jaor haet ‘t Jocus Museum ein waore metamorfose ondergaon. Mit nieje vitrines en einen haup nieje kôllektiestökke is d'r nog miër te zeen.

‘t Jocus Museum is veur idderein toegankelijk en te bezeuke op aafspraok. Iddere zondaag is 't Jocus Museum geäöpend van 13.00 wies 17.00 oor. D'n intreepriés bedruuëg € 5 per persoën. Heejveur ôntvangk geej 't unieke Jocus 1842 speldje en wuurt de bezeuker meigenaome in de historie van 't aldste volkfees det Venlo kint. Mit unieke veurwerpe, verhaole en beelde kumop de Venlose vastelaovend tot laeve.

In de tentoënstelling 'Waas geteikend' wuurt ein hommage gebrach aan Jocus' Hofteikenaer Piet Camps. Uniek en origineel werk wuurt tentoëngesteld en gaeve ein uniek beeld van Venloos bekindste illustrator.
In samewerking mit Bookhandel Koops en de femilie Camps kriég idder gezelschap nao bezeuk ‘t book “Piet Camps in Beeld” gratis mei (zoë lang de veurraod strek).
Ein bezeuk op aafspraok kin gemak waere via Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.

De veurzitter van 't Jocus Museum, d'n hiér Renier Linders is gruuëts det de tentoënstelling veur idderein is te bezichtige. "Piet Camps is vanaaf de jaore fiéftig beeldbepaolend is gewaes veur Jocus en Venlo. Hae kombineerde ein ôngekinde kreativiteit mit humor en schônk Venlo ein ôntelbaar aantal teikeninge, stök veur stök groëte en kleinere kunswerkskes. Weej zien gruuëts um 'ôzze' Piet mit dees tentoënstelling in 't vootleech te meuge zette."

Euver Piet Camps:
Piet Camps woort haos mit ein potloëd in de hand gebaore, al op zevetiën jäörige laeftiéd begôs hae mit teikene. Beej Jocus waas hae lid van Jocus' Pers & Propaganda kemissie en teikende hae vanaaf 1949 wies 2011. Meis bekind zien zien kreaties veur Staatsorgaan De Träöt. Piet Camps is De Träöt, en andersum, nog altiéd. Auk teikende hae LP-hoéze, de waalbekinde 'köpkes' beej de Jocusleedjes, maar auk de hoésordes van minnig Jocus Dreejspan. Auk d'n huidige Jocushaan is van Piet zien hand.

Veur vuuël bedriéve verzörgde hae ein advertentie, waovan d'r nog altiéd ein aantal in De Träöt geplaats waere. Daonaeve waas Piet Camps jaorelang as cartoonis verbônde aan Tante Bet en later 't E3-journaal.

Renier Linders euver de tentoënstelling 'Waas geteikend': "Same mit de femilie hebbe we geperbeerd ein waerdige selectie van al zien werk te make. Det waas ein waore opgave um iër te doon aan al die kunswerkskes die hae haet veurtgebrach. Daomei haet hae zoëvuuël minse ein plezeer gedaon. Det is hiël moei. Weej zien gruuëts um in ôs museum einen haup origineel werk te meuge tuine. Want vergaet neet: álles waat Piet teikende waas handwerk. In de tentoënstelling laote weej auk zien teikenprocess zeen: iërs schetse, de teikeninge mit de hand op maot bringe en vervolges euvertrekke nao ein zwart-wit origineel. Daonao kleurde hae de teikeninge - auk mit de hand - in en woort zien teikeninge van téksverzeen. Nao al zien werk zoelse oore kinne kiéke."


‘t Jocus Museum is te volge via social media Facebook, Twitter en Instagram via @jocusmuseum.


Adres: Dominicanenplein 25, Venlo
Kiék auk op: www.jocus.nl/museum